තිසා වැව් කොමළිය..........

Photo credit to srilankatoppicks.blogspot.com

තිසා වැව් තලය පිස එන මඳ	පවන
ගත සිත පුබුදුවයි සිහි කරමින්	නිවන
හිරු රැස් වැටී දිලිසෙන ජල කඳ	රඟන
රැඟුමන් දෙවෙනි නැත මහා සයුරේ	මැවෙන
දුටුවිට ඉපිද මිය යන ජල	තරංග
සිහිකරනවා සිතුවම් මහා	අනර්ඝ
සතුටින් ඉපිල දඟලන මාළුන්	සමඟ
පිහිනා යන්න සිතෙනවා කරමින්	තරඟ
විලියෙන් බරිත ළඳකගේ මුහුණේ	පැහැය
වැටිලා රතුයි රඟදෙන මුළු ජල	තලය
වැව් තාවුල උඩින් හිරු බසිනා	විඳිය
මන බඳිනා සිත්තමකට නම්	හොඳය
දාගැබ් පෙළ පෙනේ මහා ජය ටැඹක්	ලෙස
මාර ගස්ද ඇත රණ සෙබළුන්	විලස
ඕළු නෙළුම් මල් ඇතිරුවා සේ	පලස
සුලඟේ නටයි වැඩි කරමින් බිඟු	පවස
පොරණේ රජවරුන් දිය කෙළියෙහි	යෙඳුන
දහසක් ගොවි රජුන්ගේ කෙත් අස්	වැදුන
ඉසුරැමුණිය අසබඩ රන් දිය	පිරුන
තිසා වැව් කොමළි මුළු දැයටම	අගන
රන් මසු උයණ දිස්වේ වැව	පාමුළම
ඉසුරුමුණියේ පෙම් යුවලත් ඇත	ළඟම
මහා පවුරක් සේ දිස්වන වැව්	බැම්ම
දැක්මට යන්න හිතෙනවා මට මේ	දැම්ම